I hainatia tētahi Whakaaetanga a Mātāpono mō Rangitāne o Wairarapa me Rangitāne o Tamaki nui-ā-Rua i te 28 o Poutū-te-rangi 2014.

Ka whakahuatia ki te Whakaaetanga a Mātāpono nei ko ngā rawa ka tukuna mai e te Karauna hei utu mō ngā kerēme a Rangitāne o Wairarapa me Rangitāne o Tamaki nui-ā-Rua. Ko ngā rawa nei:

  • he moni, kei te āhua $32.5 miriona;
  • ko ngā wāhanga whenua e whitu e tino whai pānga ana ki te iwi;
  • ko te āheinga ki te hoko i ētahi whenua ohanga, tae atu ki te ngahere o Ngāumu.

Ka taea te roanga atu o te Whakaaetanga a Mātāpono te tirotiro ki konei. Kei te papa ipurangi hoki o te Tari Whakatau Take Tiriti tēnei pukapuka, me ngā kōrero tāpiri katoa.

He tino ekenga taumata te Whakaaetanga a Mātāpono i te huarahi ki te whakaturetanga o ngā mahi nei, nō reira he tino kaupapa tonu tēnei mō Rangitāne o Wairarapa me Rangitāne o Tamaki nui-ā-Rua. Ka haere tonu ngā mahi a te Tarahiti Whiriwhiri a Rangitāne ki te Karauna, kia oti rā anō tētahi Pukapuka Whakataunga. Hei te otinga o ngā mahi nei, ka waitohua te Pukapuka Whakataunga nei e te Tarahiti Whiriwhiri a Rangitāne, kātahi ka whakatakotohia ki te aroaro o te iwi hei whakaaetanga mā rātau, kāore rānei.

Kia whakaaetia rawa te Pukapuka Whakataunga, ka tukuna ki te Whare Pāremata kia whakaturetia. Hei taua wā, ka tīmata pū ngā mahi a Rangitāne Tū Mai Rā, māna e whakahaere ngā rawa ka tukuna ki te iwi.

Map of Settlement area ROW and ROTNAR
Click on map to see larger
I tēnei wā, kei te mau i te Tarahiti Whiriwhiri a Rangitāne te mana ki te kawe i ngā whiringa kōrero ki te Karauna mō ngā kerēme a Rangitāne o Wairarapa me Rangitāne o Tamaki nui-ā-Rua. Ka mau tēnei mana i te Tarahiti kia oti rā anō te tuku i te Pukapuka Whakataunga ki te iwi hei whakaaetanga mā rātau.

Mā te Tarahiti hoki e whiriwhiri kōrero ki te Karauna mō ngā tukuna tōmua, mehemea ka ara ake he huarahi e pēnei ai te kōkiri.

Kia whakaaetia e te iwi, kia whakaturetia rawatia te Pukapuka Whakataunga, ka riro katoa i a Rangitāne Tū Mai Rā ngā rawa ka tukuna mai e te Karauna. Ka mutu te wāhi ki te Tarahiti Whiriwhiri a Rangitāne, ka whakakorea ia.